عدد الرسائل: 395 العمر: 26 بلاد الاعضاء: المهن : السٌّمعَة: 3 نقاط: 446 تاريخ التسجيل: 27/08/2008
موضوع: اشحن معانا...عرض جديد من عروض تميمة الأربعاء مارس 11, 2009 1:34 am
اخواتي واخواني في الله اعضاء وزائري منتدي دموع الورد ازيكم عاملين إيه ؟ إن شاء الله تكونوا دائما بالخير ياللا تعالوا معانا فى عرض جديد من عروضنا !!!! هتقولوا إيه ... هنشترى حاجة ؟ و عليها هدية ؟ طب هنشحن بكارت نلاقى الشحن أضعاف مضاعفة ؟ هو انتم كده قربتم إحنا فعلا هنشحن بس يا ترى تفتكروا هنشحن إيه ؟ عارفين هنشحن إيه هنشحن قلوبنا .... أيوة صدقونى هنشحن قلوبنا طب إزاى ؟
كلنا اخوات هنا صح ... محدش فينا بيكون في فترة محتاج حد معاه يعينه على الطاعة و حب الله و الصبر على ممارسة العبادات عشان يوصل لحب حبيبى أو إنه بيحاول فعلا بس لوحده و ممكن إنه فى أى لحظة يبعد أو يضعف مين فينامش مرت عليه لحظات بيعاتب فيها نفسه و قلبه على غفلتهم و بعدهم عن حبيبهم و هما عارفين أد إيه حلاوة اللقاء به عارفين يعنى إيه متعة القرب منه و الإحساس بحبه بيملأ مش بس قلبك لأ كيانك كله ... عارفين الإحساس ده إحساس الحبيب إللي المشتاق لرفقة حبيبه
و دموع قلبه بتسبق دموع عنيه و لذة اللقاء و النعيم بالشعور بمدى القرب و الحب و إنك دايما حاسس بسعادة و رضا و صفاء نفس كل دى أحاسيس جميلة ممكن نعشها و نوصل لها بس هيحصل ده إزاى ؟ إحنا خلاص الموت على الابواب و إيه رأيكم لو كل واحد فينا شد حد معاه .... مش فاهمنى صح ؟ يعنى كل واحد فينا يختار معاه حد يشاركوا بعض فى: صلاة السنة و صيام اثنين و خميس، متابعة الأذكار ، قراءة قرآن كل يوم ، قيام الليل و لكم حرية الاختيار عايز تختار حد من المنتدى و تتابع معاه يا ريت و يكون جميل جداا ، تختار حد أنت تعرفه نفسك تصلح منه و تاخد بإيده يا سلام ده أجمل و أحلى عشان كده هقول لكم على فكرة : اختار حد من المنتدى و تابع معاه و حد من إللى أنت تعرفهم و بكده هتاخد ثواب أكتر أحنا هدفنا من الموضوع ده إننا نقرب بقلوبنا كلنا لربنا و بجد نكون زى البناء الواحد ياللا مين هيلحق العرض ؟ و مين هيكون مع مين ؟ انا عارفه إن الموضوع ده موجود فى منتديات تانية بأشكال و صيغ مختلفة و متنوعة لكن الاختلاف إننا مش زى بقية المنتديات إحنا منتدانا منتدى كله خير بيت بيضم أسرة كل أفرادها اتجمعوا على الحب فى الله عشان كده هنكون إن شاء الله كالبنيان المرصوص فى انتظار أقوى أسرة بتحب بعضها فى الله تشارك فى عرض شحن القلوب للقاء الله عزوجل و تقولوا لى هتعملوا إيه و تابعوا مع مين
موضوع: اشحن معانا...عرض جديد من عروض تميمة 
الأربعاء مارس 11, 2009 1:34 am
